பார்கின்சன் நோயாளிகளின் நலம் காப்போமா?

மூளையின் சப்ஸ்டான்ஷியா நிக்ரா எனப்படும் குறிப்பிட்ட பகுதியில், டோபமைன் ஹார்மோனை உற்பத்தி செய்யும் செல்கள் இழக்கும் நிலையே, பார்கின்சன் நோய் (நடுக்குவாதம்) எனக் குறிப்பிடப்படுகிறது. டோபமைன், உடல் இயக்கங்களைக் கட்டுப்படுத்தவல்லச் சிக்னல்களைக் கடத்த பேருதவி புரிகிறது. பார்கின்சன் நோய்ப்பாதிப்பிற்கு உள்ளானவர்களுக்கு, டோபமைன் சமநிலையற்ற தன்மை நிலவுவதால் அவர்களின் உடல் இயக்கங்களில் குறைபாடு நிகழ்கிறது. இந்தப் பாதிப்பு நோயாளிகளுக்கு, அன்றாட நிகழ்வுகள் கூட மிகவும் சவால் மிகுந்ததாக உள்ளன.

பார்கின்சன் நோய்ப்பாதிப்பு ஏற்படுவதற்கு, டோபமைன் சமநிலையற்ற தன்மையே காரணம் என்று குறிப்பிடப்பட்டாலும், அதன் உண்மையான காரணம் இதுவரை அறியப்படவில்லை என்பதே நிதர்சனமான உண்மை. பார்கின்சன் நோய்ப்பாதிப்பிற்கு, வயது, மரபியல், சுற்றுச்சூழலில் உடலுக்குத் தீங்கு விளைவிக்கும் நச்சுக்களின் வெளிப்பாடு உள்ளிட்ட காரணிகளும் வழிவகுப்பதாகக் கண்டறியப்பட்டு உள்ளன. பார்கின்சன் நோய்ப்பாதிப்பிற்கு உள்ளானவர்களும், அவர்களைப் பராமரிக்கும் பணியில் உள்ளவர்களும் நோய்ப்பாதிப்பின் நிலைமை, அதன் முன்னேற்றம், சிகிச்சை முறைகள் குறித்து அறிந்திருப்பது அவசியமாகிறது. பார்கின்சன் நோய்ப்பாதிப்பின் அடிப்படை வழிமுறைகளைப் புரிந்து கொள்வதன் மூலம், தனிநபர்கள் அவர்களின் சுகாதாரம் தொடர்பான சிறந்த முடிவுகளை எடுத்து, நோய்ப்பாதிப்பின் அறிகுறிகளைத் திறம்பட நிர்வகிப்பதற்கான உத்திகளை வகுக்க இயலும்.

பார்கின்சன் நோயுடன் அன்றாட வாழ்க்கையை மேற்கொள்ளல்

பார்கின்சன் நோய்ப்பாதிப்பிற்கு உள்ளாவர்கள், சவால்கள் நிறைந்த தங்களின் அன்றாட வாழ்க்கையை எவ்வாறு திறம்பட மேற்கொள்வது என்பது குறித்து முன்னணி நரம்பியல் நிபுணரை அணுக வேண்டும். அவர்களின் ஆலோசனைப்படி நடந்துகொள்வது மிகவும் முக்கியம் ஆகும். நரம்பியல் நிபுணர்களால் மட்டுமே, இந்த நோய்ப்பாதிப்பு தொடர்பான முக்கிய நுண்ணறிவுகளை வழங்க இயலும். பார்கின்சன் நோய்ப்பாதிப்பிற்கு உள்ளானவர்களுக்கு உரிய சிகிச்சை முறைகளை வழங்கி, அவர்களுக்கு நல்வாழ்க்கையைச் சாத்தியமாக்குவதற்கான உத்திகள் பின்வருமாறு தொகுக்கப்பட்டு உள்ளன.

முன்கூட்டியே திட்டமிடுதல்

முன்கூட்டியே திட்டமிடுவதன் மூலம், அன்றாட நடவடிக்கைகளைத் திட்டமிட்டு ஒழுங்கமைத்தல் மற்றும் சீரான பழக்கவழக்கத்தை உருவாக்குதல், இது அதற்குரிய கட்டமைப்பை வழங்குவதோடு, ஆற்றல் மட்டங்களை நிர்வகிப்பதும் சாத்தியமாகிறது. முக்கியமான நடவடிக்கைகளுக்கு முன்னுரிமை அளித்து, அவற்றை நிறைவேற்ற கூடுதல் நேரத்தை ஒதுக்கவும்.

சாதனங்களின் பயன்பாடு

பார்கின்சன் நோய்ப்பாதிப்பிற்கு உள்ளானவர்கள், அன்றாட நடவடிக்கைகளை ஆதரிக்க, ஏராளமான சாதனங்களின் பயன்பாடு அதிகளவில் உள்ளது. இந்தச் சாதனங்கள் நடக்க உதவும் வாக்கர்கள் முதல் தகவமைப்புப் பாத்திரங்கள் மற்றும் சிறப்பு விசைப் பலகைகள் உள்ளிட்டவைகள் உள்ளன.

மருந்துகளின் மேலாண்மை

பார்கின்சன் நோய்ப்பாதிப்பின் அறிகுறிகளைத் திறம்பட நிர்வகிப்பதற்கு, நோய்ப்பாதிப்பிற்கு உள்ளானவர்களின் வாழ்க்கைத் தரத்தை மேம்படுத்தவும் மருந்துகள் முக்கியப்பங்கு வகிக்கின்றன. மருத்துவ நிபுணர்கள் பரிந்துரைக்கும் மருந்துகள், அவற்றின் அளவுகள், அதன் சாத்தியமான பக்கவிளைவுகள் குறித்து அறிந்து கொள்வது மிகவும் முக்கியம் ஆகும்.

பரிந்துரைக்கப்பட்ட மருந்துகளை மட்டுமே பயன்படுத்தவும்

முன்னணி நரம்பியல் மருத்துவர்களால் பரிந்துரைக்கப்பட்ட மருந்துகளை மட்டுமே எடுத்துக்கொள்ள வேண்டும். மருந்துகளின் அட்டவணையைப் பின்பற்ற வேண்டும். மருத்துவர்களின் வழிகாட்டுதல் இல்லாமல், அதன் அளவுகளைத் தவிர்ப்பது அல்லது அதன் அளவுகளை மாற்றி அமைப்பது என்பது, அறிகுறிகளை நிர்வகித்தலில், ஏற்ற இறக்கங்களுக்கு வழிவகுப்பதாக அமைகின்றன.

சீர்தன்மையைக் கடைப்பிடிக்கவும்

மருத்துவரின் வழிகாட்டுதலின்படி உருவாக்கப்பட்ட மருந்து அட்டவணைகளை, அவ்வப்போது கண்காணித்து, தவறவிட்ட அளவுகளைச் சரிசெய்ய ஸ்மார்ட்போன் செயலிகள் பேருதவி புரிகின்றன.

வெளிப்படையான தொடர்பு அவசியம்

நோய்ப்பாதிப்பின் அறிகுறிகளில் ஏதேனும் மாற்றங்கள் அல்லது மருந்துகளினால் ஏதேனும் பக்கவிளைவுகள் ஏற்பட்டு இருந்தால், உடனடியாக, மருத்துவ நிபுணரிடம் அதுகுறித்துத் தெரிவிக்கவும். அறிகுறிகளைத் திறம்பட நிர்வகிக்க, மருந்து விதிமுறைகளில் மாற்றங்கள் அவசியமாகின்றன.

உடற்பயிற்சிகள் மற்றும் உடலியல் சிகிச்சைகள்

பார்கின்சன் நோய்ப்பாதிப்பிற்கு உள்ளானவர்களுக்கு, வழக்கமான உடற்பயிற்சிகள் மற்றும் உடலியல் சிகிச்சைகள் கணிசமான அளவில் பலனை அளித்து வருகின்றன. பார்கின்சன் நோயாளிகள், சரியான மற்றும் பொருத்தமான உடற்பயிற்சிகளைத் தேர்ந்தெடுத்து மேற்கொள்வதன் மூலம், அவர்களின் உடல் செயல்பாடு, சமநிலை உள்ளிட்டவை மேம்படுகின்றன. உடற்பயிற்சிகளோடு, ஏரோபிக் பயிற்சிகள், உடலின் வலிமையை அதிகரிக்கும் வகையிலான பயிற்சிகள், நீட்சிப் பயிற்சிகள் உள்ளிட்டவைகளை, அன்றாட உடற்பயிற்சிகளின் பட்டியலில் சேர்க்கவும். சைக்கிளிங் செய்தல், நீச்சல் பயிற்சி, யோகா, டை சி உள்ளிட்ட பயிற்சிகள் உடலின் ஒருங்கிணைப்பு மற்றும் நெகிழ்வுத்தன்மையை அதிகரிக்க உதவுகின்றன.

இத்தகைய பயிற்சிகளை மேற்கொண்டபிறகும், பாதிப்பின் தீவிரம் கட்டுப்படுத்தவில்லை எனில், நரம்பியல் நிபுணரின் வழிகாட்டுதலின் பேரில் நோய்ப்பாதிப்புக்கு ஏற்ற வகையிலான பயிற்சிகளை அறிந்துகொண்டு மேற்கொள்வது நல்லது.

பேச்சு மற்றும் தொழில்சார்ச் சிகிச்சைகள்

பார்கின்சன் நோயாளிகளுக்கு, உடல் இயக்கங்களில் பாதிப்பு மற்றும் சரியாகப் பேச முடியாமல் தவித்துக் கொண்டு இருப்பர். இந்தப் பாதிப்புகளானது, அவர்களின் அன்றாட நடவடிக்கைகளைக்கூட, மிகுந்த சவாலானதாக மாற்றி விடுகின்றன. சிறந்த நரம்பியல் மருத்துவர்களால் பரிந்துரைக்கப்படும் பேச்சுப் பயிற்சிகள் மற்றும் தொழில்சார்ச் சிகிச்சைகள், நோயாளிகளின் தகவல்தொடர்புகளை மேம்படுத்துவதற்கும், அன்றாட பணிகளை எளிதாகச் செய்வதற்கும் உதவுகிறது.

பேச்சுச் சிகிச்சை

பார்கின்சன் நோய்ப்பாதிப்புக்கு உள்ளானவர்கள், பேச்சில் தெளிவு, சுவாச வீதத்தில் கட்டுப்பாடு உள்ளிட்டவைகளை மேம்படுத்த நிபுணத்துவம் பெற்ற பேச்சு சிகிச்சையாளரை அணுகுவது அவசியம் ஆகும். குரல் பயிற்சிகள், சுவாசப் பயிற்சிகள், பேசுவதில் விரைவுத் தன்மை உள்ளிட்ட பயிற்சிகள், பார்கின்சன் நோயாளிகளுக்கு, நிபுணர்கள் பயிற்றுவிக்கின்றனர்.

தொழில்சார்ச் சிகிச்சைகள்

பார்கின்சன் நோயாளிகள், தங்களின் அன்றாடப் பணிகளை எளிதாக்கும் வகையில் தகவமைப்பு உத்திகள் மற்றும் உதவிக்கரம் நீட்டும் வகையிலான பரிந்துரைக்கப்பட்ட சாதனங்களின் பயன்பாட்டை மேற்கொள்ள, தொழில்சார்ச் சிகிச்சையாளருடன் இணைவது அவசியமாகும். எழுதுதல், ஆடை அணிதல், உணவு பரிமாறுதல் உள்ளிட்ட பயிற்சிகளும், அவர்களுக்குப் பயிற்றுவிக்கப்படலாம்.

உளவியல் மற்றும் உணர்ச்சி சார்ந்த நல்வாழ்வு

பார்கின்சன் நோயாளிகளுக்கு, சில தருணங்களில் உணர்ச்சிகள் அதிகமாக இருத்தலோ அல்லது கவலை உணர்வுடன் காணப்படுவது மிகவும் இயல்பானது என்றபோதிலும் இந்தக் குறைபாட்டை, அதன் துவக்க நிலையிலேயே களைய சிகிச்சையாளரின் பங்களிப்பு மிக முக்கியமானது ஆகும்.

உணர்ச்சிகளை வெளிப்படுத்த வேண்டும்

சோகம், விரக்தி, பதட்டம் உள்ளிட்ட பல்வேறுவிதமான உணர்ச்சிகளை மனிதர்கள் தன் வாழ்நாளில் இயல்பாகவே தொடர்ந்து அனுபவித்து வருகின்றனர். இந்த உணர்ச்சிகளைச் சரியாக அடையாளம் கண்டுகொள்ளவும், தேவைப்படும்பட்சத்தில், மனதிற்குப் பிரியமானவர்கள் அல்லது மனநல நிபுணர்களிடம் இருந்து சரியான அளவிலான ஆதரவைப் பெறுவது அவசியம் ஆகும்.

மன அழுத்தத்தைக் குறைத்தல்

தளர்வு உணர்ச்சி மற்றும் மன அழுத்தத்தைக் குறைக்கும் வகையிலான நடவடிக்கைகளில் ஈடுபடுவது ஊக்குவிக்கப்பட வேண்டும். தியானம், ஆழ்ந்த சுவாசப் பயிற்சிகள், நினைவாற்றலை மேம்படுத்தும் பயிற்சிகள், மனதிற்கு மகிழ்ச்சியை அளிக்கும் வகையிலான பொழுதுபோக்கு நடவடிக்கைகளில் ஈடுபடுதல் உள்ளிட்ட நிகழ்வுகளானது, உணர்ச்சி நல்வாழ்வுக்கு முக்கியப்பங்கு வகிக்கின்றன.

ஆதரவுக் குழுக்களில் இணைய வேண்டும்

பார்கின்சன் நோய்ப்பாதிப்பின் அனுபவங்களை மற்றவர்களுடன் பகிர்ந்து கொள்ளும் வகையில், அதற்கான ஆதரவுக் குழுக்களுடன் இணைவதன் மூலம், சமூகத்தின் உணர்வையும், உணர்ச்சிப்பூர்வமான ஆதரவையும் பெற இயலும். இதற்கென உள்ள ஆன்லைன் மன்றங்கள், உள்ளூரில் செயல்படும் ஆதரவுக் குழுக்கள் அல்லது பார்கின்சன் பாதிப்பிற்கான விழிப்புணர்வை மையமாகக் கொண்டு இயங்கும் நிறுவனங்களின் மூலமும், போதிய ஆதரவினைப் பெற இயலும்.

சமாளிக்கும் உத்திகளை வளர்த்துக் கொள்ளுதல்

பார்கின்சன் நோய்ப்பாதிப்பைச் சமாளிக்கும் நிகழ்வானது, நோயாளிகளுக்கும், அதன் பராமரிப்பாளர்களுக்கும் மிகுந்த சவாலான நடவடிக்கை ஆகும்.பயனளிக்கும் வகையிலான சமாளிக்கும் உத்திகளைப் பின்பற்றுவதன் மூலம், மன அழுத்தத்தை நிர்வகிப்பது மட்டுமல்லாது, அவர்களின் ஒட்டுமொத்த வாழ்க்கைத்தரத்தை மேம்படுத்த உதவுகின்றன.

சரியான தகவல்களைத் தெரிந்து கொள்ளுங்கள்

பார்கின்சன் நோய் விவகாரத்தில், மேற்கொள்ளப்படும் சிகிச்சைமுறையில் சமீபத்திய ஆராய்ச்சி மற்றும் முன்னேற்றங்களுடன் அப்டேட் நிலையில் இருக்க வேண்டியது அவசியம் ஆகும். இந்த அப்டேடட் நிகழ்வானது, சிறந்த முடிவுகளை எடுக்கவும், பராமரிப்பாளர்கள், பராமரிப்பு நிகழ்வுகளில் தீவிரமாகப் பங்கேற்கத் தேவையான நுட்பங்களைப் பயிற்றுவிக்க உதவுகின்றன.

சுயக் கவனிப்பை நடைமுறைப்படுத்துங்கள்

உடற்பயிற்சி செய்தல், பொழுதுபோக்கு நடவடிக்கைகளில் ஈடுபடுதல், சமூகத் தொடர்புகளை வளர்த்துக் கொள்ளுதல் உள்ளிட்ட சுயப் பாதுகாப்பு நடவடிக்கைகளுக்கு முன்னுரிமை அளிப்பதன் மூலம், நல்வாழ்க்கையைச் சாத்தியமாக்கிக் கொள்ள இயலும்.

நேர்மறை எண்ணங்களை வளர்த்துக் கொள்ளுதல்

பார்கின்சன் நோயாளிகளின் பலம் மற்றும் சாதனைகளில் அதிகக் கவனம் செலுத்துவது, நேர்மறையான மனநிலையை ஏற்படுத்திக் கொள்வது உள்ளிட்ட நடவடிக்கைகளின் மூலம், சவால்களை முறியடித்து, வாழ்க்கையில் நம்பிக்கையுடன் வீறுநடைப் போட்டுச் செல்ல உதவும்.

மேலும் வாசிக்க : யோகா உங்கள் மூளையைச் சாதகமாக மாற்ற உதவுகிறதா?

நோயாளிகள் மற்றும் பராமரிப்பாளர்களுக்கான உதவிக்குறிப்புகள்

பார்கின்சன் நோய்ப்பாதிப்பில் இருந்து விரைவில் நலம் பெற நோயாளிகளுக்கும், அவர்களின் பராமரிப்பாளர்களுக்கும் இடையில் பயனுள்ள வகையிலான தகவல்தொடர்புகளைப் பேணுவதன் மூலம் சிறந்த கவனிப்பு மற்றும் வாழ்க்கைத்தர மேம்பாடு சாத்தியமாகும்.

வெளிப்படையாக இருத்தல்

பார்கின்சன் நோயாளிகள், தங்களின் பராமரிப்பாளர்களுடன் திறந்த மனதுடன், நேர்மறையான உரையாடல்களை மேற்கொள்ள வேண்டும். கவலைகள், தேவைகள், விருப்பங்கள் குறித்து வெளிப்படையாக விவாதிக்கவும், தகவல் பரிமாற்றத்தைச் சரியான முறையில் மேற்கொள்வதன் மூலம், பராமரிப்பு நடவடிக்கைகளை மேம்பட்ட முறையில் வடிவமைக்க உதவுகிறது.

ஆதரவான சூழல்

மற்றவர்கள் என்ன சொல்கின்றனர் என்பதில், பார்கின்சன் நோயாளிகள் தங்களின் முழுக்கவனத்தைச் செலுத்துவதின் மூலம், இது உங்களுக்கான புரிதலை மேம்படுத்துகிறது. இதன்மூலம், உங்களுக்கு ஆதரவான சூழல் சாத்தியமாகிறது.

உடல் மொழிகளில் கவனம்

உணர்ச்சிகள் மற்றும் தேவைகளைத் திறம்பட நிர்வகிக்க நோயாளிகளின் உடல் மொழிகள், முக பாவனைகள் உள்ளிட்ட சொற்கள் அல்லாத குறிப்புகளில் கூடுதல் கவனம் செலுத்த வேண்டும்.

பார்கின்சன் நோயாளிகளுக்கான ஊட்டச்சத்து வழிகாட்டுதல்கள்

பார்கின்சன் நோய்ப்பாதிப்பின் அறிகுறிகளையும், நல்வாழ்க்கையையும் நிர்வகிக்க, ஆரோக்கியமான மற்றும் சீரான உணவுமுறை மிகவும் இன்றியமையாததாக உள்ளது.

அதிக ஆக்சிஜனேற்றம் கொண்ட உணவுகளைச் சாப்பிட வேண்டும்

கீரை வகைகள், தக்காளி, அவுரிநெல்லிப் போன்ற பழ வகைகளில் அதிக ஆக்சிஜனேற்ற பண்புகள் உள்ளன. இந்தப் பழ வகைகள் மற்றும் காய்கறிகளை உங்கள் உணவில் சேர்த்துக் கொள்வதில் கூடுதல் கவனம் செலுத்த வேண்டும். இந்த உணவுவகைகளில் உள்ள ஊட்டச்சத்துகள், நியூரோபிராக்டிவ் நன்மைகளை வழங்கக்கூடியதாக உள்ளன.

புரத உட்கொள்ளலை உறுதிப்படுத்த வேண்டும்

பார்கின்சன் நோய்ப்பாதிப்பு சிகிச்சையில் வழங்கப்படும் மருந்துகள், உடலின் புரத மதிப்புகளில் மாறுபாட்டை ஏற்படுத்த கூடும். உடலின் செயல்பாடுகளுக்கு, புரதம் முக்கியப் பங்கு வகிப்பதை யாரும் எளிதில் மறந்துவிட இயலாது. ஊட்டச்சத்து அல்லது சுகாதார நிபுணரைக் கலந்தாலோசித்து, அதற்கேற்ற உணவுத்திட்டத்தை மாற்றி அமைத்துக் கொள்ளவும்.

உடலின் நீர்ச்சமநிலையைப் பராமரிக்க வேண்டும்

பார்கின்சன் நோய்ப்பாதிப்பிற்கு அளிக்கப்படும் மருந்துகளினால் ஏற்படும் பக்க விளைவுகள் மற்றும் செரிமான பிரச்சினைகளைக் களைதல் மற்றும் உடல் ஆரோக்கியத்தை மேம்படுத்த உடலில் நீர்ச்சமநிலையைச் சரியான அளவிற்குப் பராமரிப்பது இன்றியமையாதது ஆகும். தினமும் 7 முதல் 8 கிளாஸ் தண்ணீர்க் குடிக்க இலக்கு நிர்ணயித்துக் கொள்வது நல்லது.

மேற்குறிப்பிட்ட வழிமுறைகளைக் கவனமாகக் கையாண்டு, பார்கின்சன் நோய்ப்பாதிப்பிற்கு உள்ளானவர்களை, பராமரிப்பாளர்களின் உதவியுடன், வளமான மற்றும் ஆரோக்கியமான நல்வாழ்க்கை வாழ வழிவகைச் செய்வோமாக…